க.பரமத்தி, செப். 12:  சின்னதாராபுரம் வடக்கு ஆதிபராசக்தி மன்றம் சார்பில் நடந்த கஞ்சிக்கலய விழாவில் ஏராளமான பக்தர்கள் பங்கேற்று ஊர்வலமாக சென்றனர். க.பரமத்தி ஒன்றியம் சின்னதாராபுரம் வடக்கு ஆதிபராசக்தி வழிபாட்டு மன்றம் சார்பில் ஆடிப்பூர விழாவையொட்டி தென்னிலை நெடுஞ்சாலையில் அமைந்துள்ள ஆதிபராசக்தி வழிபாட்டு மன்றத்தில் சிறப்பு வழிபாடு நடத்தப்பட்டு கஞ்சிக்கலய விழாவில் அக்னி சட்டி மற்றும் முளைப்பாரி ஊர்வல விழா நடைபெற்றது. விழாவையொட்டி சிறப்பு வேள்வி நடத்தப்பட்டது. தொடர்ந்து மாலை 4 மணிக்கு கஞ்சிக்கலய விழா ஊர்வலம் நடைபெற்றது. மாவட்ட தணிக்கை இணை செயலாளர் வடிவேல் வரவேற்றார். சின்னதாராபுரம் வழிபாட்டு மன்ற நிர்வாகிகள் சுலோச்சனா, ஓம்சக்தி ரமேஷ், இளங்கோவன், பிரகாஷ், கோபால், மணிவேல் ஆகியோர் முன்னிலை வகித்தனர்.

விழாவிற்கு மாவட்ட தலைவர் ஜெயச்சந்திரன் தலைமை வகித்து பேசினார். பிறகு கஞ்சிக்கலய ஊர்வலத்தை தொடங்கி வைத்தார். வழிபாட்டு மன்ற வளாகத்தில் இருந்து புறப்பட்ட கஞ்சிக்கலய ஊர்வலம் அரசு கால்நடை மருந்தகம், அரசு ஆரம்ப சுகாதார நிலையம், ஆண்கள், பெண்கள் மேல்நிலைப்பள்ளிகள், காவல் நிலையம் வழியாக பேருந்து நிலையம் வரை சென்று மீண்டும் வழிபாட்டு மன்ற கோயிலை சென்றடைந்தது. இதில் ஏராளமான பக்தர்கள் பங்கேற்று ஊர்வலமாக கஞ்சிக்கலயம், அக்னி சட்டி மற்றும் முளைப்பாரி கொண்டு சென்றனர். பிறகு வேள்வி பூஜைகள் நடத்தி பக்தர்கள் வழிபாடு செய்தனர்.