பரமத்திவேலூர், செப்.12:  காமராஜர் விருது பெற்ற பரமத்திவேலூர் மாணவிக்கு பாராட்டு விழா நடந்தது. பரமத்திவேலூர் தாலுகா ஜேடர்பாளையத்தை அருகே புதுப்பாளையத்தை சேர்ந்தவர் சண்முகம். இவரது மகள் ஜீவியா. இவர் ஜேடர்பாளையம் அரசு மேல்நிலைப்பள்ளியில், 8ம் வகுப்பு முதல் பிளஸ்2 வரை படித்தார். தற்பொழுது நாமக்கல்லில் உள்ள தனியார் கல்லூரியில் படித்து வருகிறார். இவர் ஜேடர்பாளையம் அரசு பள்ளியில் படிக்கும்போது நடந்த பாட்டுப் போட்டி, நடனப்போட்டி, ஓவியப் போட்டி, பேச்சுப்போட்டி, நாடகம் உள்ளிட்ட பல்வேறு போட்டிகளில் கலந்துகொண்டு 25க்கும் மேற்பட்ட பரிசுகளை பெற்றுள்ளார்.

இவருக்கு சென்னையில் நடைபெற்ற விழாவில் 2017- 18ம் ஆண்டுக்கான காமராஜர் விருதும், ₹20ஆயிரத்திற்கான காசோலையையும், தமிழக கல்வித்துறை அமைச்சர் செங்கோட்டையன் வழங்கி பாராட்டினார். காமராஜர் விருது பெற்ற மாணவி ஜீவியாவை, ஜேடர்பாளையம் பள்ளி தலைமை ஆசிரியர் மற்றும் ஆசிரியர்கள், பெற்றோர் ஆசிரியர் கழகத்தினர் பாராட்டி வாழ்த்து தெரிவித்தனர்.