தா.பேட்டை, செப்.11: முசிறி அடுத்த திருத்தியமலை கிராமத்தில் வட்டார வேளாண்மை தொழில்நுட்ப மேலாண்மை முகமை மாநில திட்டங்களுக்கான உறுதுணை சீரமைப்பு திட்டத்தின் கீழ் திறன் மேம்பாட்டு பயிற்சி நடைபெற்றது. முசிறி வட்டார வேளாண்மை உதவி இயக்குனர் பாண்டியன் தலைமை வகித்தார். அட்மா திட்டத்தின் வட்டார தொழில் நுட்ப மேலாளர் பூபதி வரவேற்றார். வேளாண் வணிகத்துறை வேளாண்மை அலுவலர் முரளிதரன் விவசாய ஆர்வலர் குழு, உழவர் உற்பத்தியாளர் நிறுவனம் அமைத்தல் குறித்தும், துணை வேளாண்மை அலுவலர் கணேசன் வேளாண்மை துறையின் திட்டங்கள் பற்றியும் விளக்கிப் பேசினர். பயிற்சியில் விவசாய ஆர்வலர் குழுக்களை சார்ந்த விவசாயிகள் பலரும் கலந்து கொண்டனர். உதவி வேளாண்மை அலுவலர் சுரேஷ்குமார் நன்றி கூறினார். பயிற்சிக்கான ஏற்பாடுகளை உதவி தொழில்நுட்ப மேலாளர்கள் ராகினி, அனிதா ஆகியோர் செய்திருந்தனர்.