ராஜபாளையம், செப். 11: ராஜபாளையத்தில் முறையான ஆவணங்களின்றி இயங்கிய 10 மணல் லாரிகளை அதிகாரிகள் பறிமுதல் செய்தனர்.
ராஜபாளையம் தாசில்தார் ராமச்சந்திரன் தலைமையில் வருவாய்த் துறை அதிகாரிகள் நகரில் உள்ள மதுரை சாலை பகுதியில் நேற்று அதிகாலையில் வாகன சோதனையில் ஈடுபட்டனர். அப்போது லாரிகளை நிறுத்தி, அவற்றுக்கு உரிய ஆவணங்கள் உள்ளதா என்று அதிகாரிகள் சோதனையிட்டனர்.
அந்த வழியாக புதுக்கோட்டை மாவட்டம் அறந்தாங்கியிலிருந்து ராஜபாளையம் வழியாக சென்ற 10 மணல் லாரிகளை நிறுத்திய அதிகாரிகள் அவற்றின் ஆவணங்களை சரி பார்த்தனர். இதில், லாரிகளுக்கு முறையான ஆவணங்கள் இல்லாதது தெரிய வந்தது. இதனையடுத்து அந்த லாரிகளை பறிமுதல் செய்த அதிகாரிகள், ராஜபாளையம் வட்டாட்சியர் அலுவலகத்திற்கு அவற்றை கொண்டு சென்றனர்.