அரவக்குறிச்சி. செப்.11: அரவக்குறிச்சி அடுத்த பள்ளபட்டி அரசு மேல்நிலை பள்ளி கால்பந்தாட்ட அணியினர் கரூரில் நடைபெற்ற மாவட்ட அளவிலான போட்டியில் முதலிடம் பெற்றனர். அரவக்குறிச்சி, கரூர், குளித்தலை, கிருஷ்ணராயபுரம் ஆகிய வட்டங்களில் உள்ள பள்ளி மாணவர்கள் 19 வயதிற்குட்பட்டோருக்கான கால்பந்தாட்ட போட்டிகள் அந்தந்த வட்டங்களில் நடைபெற்றது. இதில் வெற்றிபெற்ற அணியினருக்கு மாவட்ட அளவிலான போட்டிகள் கரூர் அடுத்த புலியுர் ராணிமெய்யம்மை மேல்நிலைப்பள்ளியில் நடைபெற்றது. இதில் அரவக்குறிச்சி வட்ட அளவில் வெற்றி பெற்றிருந்த பள்ளபட்டி கால்பந்தாட்ட அணியினர் கலந்து கொண்டனர். இப்போட்டியில் மாரிஸ்ட் உடையாபட்டி அணியை 2-0 என்ற கோல் கணக்கில் வென்று இறுதி போட்டியில் ராணிமெய்யம்மை மேல்நிலைப்பள்ளியை 5-0 என்ற கோல் கணக்கில்  டை பிரேக்கர் முறையில் வெற்றி பெற்று முதலிடம் பிடித்தனர். இதேபோல 14 வயதிற்குட்பட்டோர் பிரிவில் பள்ளபட்டி அரசு மேல்நிலை பள்ளி கால்பந்தாட்ட அணியினர் மாவட்ட அளவில் இரண்டாமிடம் பெற்றனர். வெற்றி பெற்ற அணியினரை தாளாளர், தலைமையாசிரியர், உதவித் தலைமையாசிரியர்கள், ஆசிரியர்கள், மாணவ- மாணவிகள் பாராட்டு தெரிவித்தனர்.