மதுரை: மதுரை இஸ்மாயில்புரம் 8வது தெருவை சேர்ந்த பெண்கள் 50க்கு மேற்பட்டவர்கள் நேற்று கலெக்டர் அலுவலகத்திற்கு வந்தனர். கலெக்டர் வீரராகவராவிடம் கோரிக்கை மனு கொடுத்தனர். அதில்,‘ மாநகராட்சி சார்பில் 4 நாட்களுக்கு ஒரு முறை தண்ணீர் விநியோகம் செய்யப்படுகிறது. கடந்த வாரம் எங்கள் பகுதியில் குடிதண்ணீர் வராத காரணத்தால் போராட்டம் நடத்தினோம். மாநகராட்சி சார்பில் புறநகரில் இருந்து லாரியில் தண்ணீர் வழங்கப்பட்டது. தற்போது மீண்டும் எங்கள் பகுதிக்கு தண்ணீர் விட மாநகராட்சி மறுக்கிறது. மற்ற பகுதிக்கு தண்ணீர் வரும் போது அதே நேரத்தில் எங்கள் தெருவுக்கு மட்டும் தண்ணீர் விட மாநகராட்சி ஊழியர்கள் மறுக்கின்றனர். மேலும் இரவில் வீடுகளில் சோதனை செய்கிறோம் என கூறி மாநகராட்சி ஊழியர்கள் மது அருந்திவிட்டு வீட்டில் உள்ள பெண்களை மிரட்டுகின்றனர். இதனால் மன உழைச்சலுக்கு ஆளாகியுள்ளோம். வழக்கம் போல் எங்கள் தெருவுக்கு குடிநீர் விநியோகம் செய்ய வேண்டும் என தெரிவித்திருந்தனர். இது தொடர்பாக மாநகராட்சி அதிகாரிகள் நடவடிக்கை எடுக்க கலெக்டர் பரிந்துரை செய்து மாநகராட்சிக்கு மனுவை அனுப்பினார்.