கூடலூர்: கூடலூர் அருகே பளியன்குடி கண்ணகி கோயிலில் லட்சுமி விநாயகர் சிலை பிரதிஷ்டை நேற்று நடந்தது. தேனி மாவட்டம், கூடலூர் அருகே உள்ள பளியன்குடி அடிவாரப்பகுதியில் கண்ணகி கோயில் உள்ளது. இதன் வளாகத்தில் பேச்சி அம்மன், வெற்றிவேல் முருகன், ராக்காச்சி அம்மன் சிலைகள் உள்ளன. தற்போது புதிதாக லட்சுமி விநாயகர் சிலை நிறுவப்பட்டுள்ளது. இந்த சிலைக்கு புனித நீர் தெளித்து  பிரதிஷ்டை செய்யும் விழா நேற்று நடைபெற்றது.

முன்னதாக, பூசாரி கந்தவேல் நவரிஷி தலைமையில் அதிகாலை முதல் சிறப்பு யாகம், பூஜைகள் நடைபெற்றது. பிரதிஷ்டை நிகழ்ச்சியை ஒட்டி பக்தர்கள் கோயில் வளாகத்தில் பொங்கல் வைத்து பொதுமக்களுக்கு வழங்கினர். விழாவில் ஏராளமான பக்தர்கள் குடும்பத்துடன் கலந்து கொண்டனர். பக்தர்களுக்கு கோயில் சார்பாக அன்னதானம் வழங்கப்பட்டது. ஏற்பாடுகளை கண்ணகி கோயில் விழா கமிட்டியை சேர்ந்த கார்த்திகேயன், முத்தையா, ராஜேஸ்வரன் செய்திருந்தனர்.