SUN குழுமத்திலிருந்து வெளிவரும் காலை நாளிதழ்

எண்வகை செல்வமருளும் மகாலட்சுமி

2018-09-07@ 09:39:31

அனைத்துத் துன்பங்களையும் நீக்கி எட்டு வகையான செல்வங்களையும் வழங்கும் சிறப்பு மிக்க தலமாகக் கடவில் மகாலட்சுமி ஆலயம் திகழ்கிறது. இந்த ஆலயம் கேரளா மாநிலம், ஆலப்புழை மாவட்டம், பள்ளிப் புரம் என்னும் இடத்தில் அமைந்திருக்கிறது. ஆயிரம் ஆண்டுகளுக்கு முன்பு, தமிழ்நாட்டில் காஞ்சிபுரம் பகுதியில் நெசவுத் தொழில் செய்து வந்த சில குடும்பத்தினர், வாழ்வாதாரத்தினைப் பெருக்கிக் கொள்வதற்காகக் கேரளாவிலுள்ள சேர்த்தலா அருகிலுள்ள ஒரு இடத்திற்கு இடம் பெயர்ந்து சென்றனர். அங்கு தொழிலைத் தொடங்குவதற்கு முன்பாக, அவர்கள் காஞ்சிபுரத்தில் வழிபட்டு வந்த மகாலட்சுமியை நினைத்து வழிபட்டனர்.

அங்கு அவர்களது தொழிலுக்கு நல்ல மதிப்பும், வருவாயும் கிடைத்தது. அவர்களது வாழ்வுக்குத் தேவையான அனைத்து வளங்களும் பெருகின. மகிழ்ச்சியடைந்த அவர்கள், காஞ்சிபுரத்தில் இருக்கும் மகாலட்சுமியைத் தாங்கள் இருக்கும் இடத்திற்கு வந்து கோயில் கொள்ள வேண்டினர். அவர்களின் வேண்டுதலை ஏற்ற மகாலட்சுமியும், காஞ்சிபுரத்தில் இருந்து முதலை ஒன்றின் மேல் அமர்ந்து அவர்கள் இருக்கும் இடத்தைச் சென்றடைந்தாள். அங்கிருக்கும் குளம் ஒன்றின் கரையில் தாங்கள் வழிபட்டு வந்த மகாலட்சுமியே வந்திறங்கி இருப்பதை சூட்சுமமாக அறிந்த மக்கள், அங்குப் புதிதாக ஆலயம் ஒன்றைக் கட்டி வழிபாடு செய்யத் தொடங்கினர் என்கிறது இந்தக் கோயில் தல வரலாறு.

இத்தலத்தில் அருளும் மகாலட்சுமி கிழக்கு நோக்கி நின்ற நிலையில், முன்புற வலது கையில் நெற்கதிர்கள், இடது கையில் கிளி, பின்புற வலது கையில் சக்கரம், இடது கையில் சங்கு ஆகியவைகளைக் கொண்டிருக்கிறாள். எட்டு வகையான செல்வங்களையும் வழங்கும் செல்வ லட்சுமியாக (ஐஸ்வரிய லட்சுமி) வழிபடப்படும் இந்த தேவி, ‘கடவில் ஸ்ரீ மகாலட்சுமி என்று அழைக்கப்படுகிறார். கேரள மாநிலத்தில் மகாலட்சுமிக்கென்று அமைந்த ஒரே கோயில் இது என்பதால், இவரை மலையாள மகாலட்சுமி என்றும் அழைக்கின்றனர்.

இக்கோயிலின் சுற்றுப்பகுதியில் கணபதி, சிவபெருமான், ஐயப்பன், கொடுங்காளி, க்ஷேத்திர பாலகர்கள்யிருக்கின்றனர். ஆலயத்தின் நுழைவு வாசலில் ஒன்பது கோள்களுக்கான அதிதேவதைகள் ஒரே இடத்தில் இருப்பது தனிச்சிறப்பாகக் கருதப்படுகிறது.  கேரள நாட்காட்டியின் படி மகரம் (தை) மாதத்தில் வரும் புனர் பூசம் நட்சத்திர நாளில் ஆலயம் நிறுவப்பட்ட நாள் மற்றும் மகரசங்கராந்தி நாள், கும்பம் (மாசி) மாதத்தில் வரும் மகா சிவராத்திரி, கன்னி (புரட்டாசி) மாதம் வரும் நவராத்திரி நாட்களிலும் சிறப்பு வழிபாடுகள் நடைபெறுகின்றன. கர்கடகம் (ஆடி) மாதம் முழுவதும் கேரளாவில் அனைத்து அம்மன் தலங்களிலும் சிறப்பு வழிபாடுகள் செய்யப்படுவதுண்டு. அதேபோன்று தலத்திலும் மகாலட்சுமித் தாயாருக்குச் சிறப்பு வழிபாடுகள் செய்யப்படுகின்றன. தனுர் (மார்கழி) மாதத்தில் இந்த ஆலயத்தில் 12 நாட்கள் நடைபெறும் ‘களபபூஜை’ தனித்துவம் மிக்கதாக கருதப்படுகிறது.

இக்கோயிலில் சூரிய உதயத்தின்போது, இங்குள்ள மகாலட்சுமி வந்திறங்கிய குளத்திலுள்ள நீரைச் சிறிது எடுத்து அருந்தி மகாலட்சுமியை வழிபடுபவர்களுக்கு, விஷ்ணு, மகாலட்சுமி இருவரையும் சேர்த்து வழிபட்ட பலன்கள் கிடைக்கும் என்கின்றனர். மேலும், திருமணத் தடைகள் இருந்தால் அவை நீங்கி விரைவில் திருமணம் நடைபெறும் என்பதும் நம்பிக்கையாக உள்ளது. இங்கு வந்து வழிபடும் பக்தர்களுக்கு எட்டு வகையான செல்வங்கள் கிடைக்கும் என்கிறார்கள். செல்வம், ஞானம், உணவு, மன உறுதி, புகழ், வீரம், நல்ல புதல்வர்கள், விரும்பியதை விரைவாக முடிக்கும் ஆற்றல் எனும் எட்டு வகையான செல்வங்களை (ஐஸ்வர்யம்) வழங்கும் கடவுளாகச் செல்வலட்சுமி (ஐஸ்வர்ய லட்சுமி) இருக்கிறார். இதனால் லட்சுமியை, அஷ்ட லட்சுமி என்றும் சொல்கின்றனர்.

உப்புத் தன்மையுடன் இருக்கும் மிகப்பெரிய ஏரிக்கு அருகில், மகாலட்சுமி வந்து இறங்கிய நீர் நிலை இருக்கிறது. ஆனால், இந்த நீர்நிலையில் மட்டும் சுவையான குடிநீர் இருப்பது இந்த ஆலயத்தின் சிறப்புகளில் ஒன்றாகக் கருதப்படுகிறது. மகாலட்சுமி இறங்கியதாகக் கருதப்படும் அந்த இடத்தை இன்றும் பராமரித்து வருகின்றனர். தொடக்க காலத்தில் மகாலட்சுமியை இங்கு கொண்டு வந்து சேர்த்த முதலைக்குத் தினமும் உணவு கொடுத்துக் கோயில் அருகிலேயே வழிபட்டு வந்ததாகவும், பிற்காலத்தில் முதலையின் சிலையைக் கல்லால் வடித்துக் கோயில் கருவறையின் அருகில் வைத்து விட்டதாகவும் சொல்லப்படுகிறது.  கேரள மாநிலம் ஆலப்புழையில் இருந்து 30 கிலோமீட்டர் தொலைவில் இருக்கிறது சேர்த்தலா என்ற இடம். இங்கிருந்து வடகிழக்கில் 7 கிலோமீட்டர் தொலைவில் அமைந்திருக்கும் மகாலட்சுமி ஆலயத்திற்கு சேர்த்தலாவில் இருந்து சில தனியார் பேருந்துகள் இயக்கப்படுகின்றன.

ஜெயகுமார்

மேலும் செய்திகள்

Like Us on Facebook Dinkaran Daily News
  • 20-07-2019

    20-07-2019 இன்றைய சிறப்பு படங்கள்

  • hotairballoonchina

    சீனாவில் நடைபெற்ற ராட்சத பலூன் போட்டி: சுமார் 100 பலூன்கள் ஒரே சமயத்தில் வானுயர பறந்த காட்சிகள்

  • CornwallJellyfishEncounter

    இங்கிலாந்தில் ஆளுயரத்திற்கு வளர்ந்துள்ள பிரம்மாண்டமான ஜெல்லி மீன்..: ஆச்சரியமூட்டும் புகைப்படங்கள்

  • newzealandexplosion

    எரிவாயு கசிவு காரணமாக நியூஸிலாந்தில் வீடு ஒன்று வெடித்து சிதறி தரைமட்டம்: 6 பேருக்கு படுகாயம்!

  • apollo

    புளோரிடாவில் மனிதன் நிலவில் கால்பதித்த 50-ம் ஆண்டு நிகழ்வு கொண்டாட்டம்: விண்வெளி வீரர்கள் சிலைகள் பார்வைக்கு வைப்பு

படங்கள் வீடியோ கல்வி சினிமா ஜோ‌திட‌ம்