தவக்கோலம் காரணம்

சபரிமலையில் அருளாட்சி புரிகிற ஐயப்பனின் தவக்கோலம் அதிஅற்புதமானது. தன் அவதார காரணம் பூர்த்தி பெற்று விட்டதாகவும், அதனால் சபரிமலையில் தவமிருக்க போவதாகவும், தன்னை தரிசிக்க வேண்டும் என்றால் அங்கு வருமாறும் கூறி சபரி மலையில் 18 படிகளுக்கு மேல் ஐயப்பன் தவக்கோலத்தில் காட்சி தருகிறார். இன்றும் நாம் ஐயப்பனை அந்த தவக்கோலத்திலேயே தரிசித்து வணங்குகிறோம். இந்த கோலத்தை காணும்போது, ஐயப்பனின் இரு கால்களிலும் துண்டு கட்டி இருப்பது போன்று தெரியும். இதற்கும் ஒரு காரணம் கூறப்படுகிறது. ஒருமுறை ஐயப்பனை காண, அவரை வளர்த்து ஆளாக்கிய பந்தள மகாராஜா வந்தார்.

அவர் வந்தபோது தந்தை என்ற காரணத்தால், அவருக்கு மதிப்பு வழங்கும் நோக்கத்தில் ஐயப்பன்  எழ முயன்றார். இறைவன் தனக்கு மரியாதை செய்ய எழுந்திருக்கக்கூடாது என்பதற்காக, தான் தோளில் போட்டிருந்த பட்டு அங்கவஸ்திரத்தை, ஐயப்பனை நோக்கி தந்தையான பந்தள மகாராஜா தூக்கி போட்டாராம். அப்போது அந்த அங்கவஸ்திரம், ஐயப்பன் காலைச் சுற்றிக் கொண்டதாக கூறப்படுகிறது. உற்று நோக்கினால் ஐயப்பன் அமர்ந்த கோலத்திலிருந்து சற்றே எழுந்திருப்பது போல் தோன்றும் என்றும் கூறுகிறார்கள். ஐயப்பனின் இந்த திரு உருக்காட்சி, பல்வேறு வாழ்வியல் பண்புகளையும் பக்தர்களுக்கு உணர்த்தி நிற்கிறது.

(நாளையும் மலையேறுவோம்...)